Wias ogfanga hat

2008 wars, da is a kloana einsamer Stromgitarrenspieler zum Musiziern eigladn gwen. Wia a hiekema is, siegt a, dass da 4 Hansl mit akustische Instrument gspuit haben. Des hat eam ned recht daugt. Trotzdem packt a sei elektrische Klampfen aus uns steckt sein Stecker nei.

Da is a na gstandn, d`Fender Stratocaster in de Pratzn, an Regler voi aufdraht, an Verzerrer irgendwo zwischn am Jimi Hendrix und am Angus Young hiedraht, und hat koa Ahnung wia a mit seim Sound bei dem Bob Dylan Liadl ... Don`t think Twice ... mitspuin soi.

A paar Hoibe spater hat a dann de Andern doch no zu a paar fetzigere Stickl übaredn kenna. So is oganga und so haben`s unter dem Nama Rusted Pirates auf etliche Festl gspuit.

Mit da Zeit is zwoa vo dene Musikanten d`Musi a weni z` hart worn, und de san überraschnd ausgstiegn. So, jetz sans dagstandn. 
Da Sven, da Harti und da Sutti. Voi dabei, guad drauf aba ohne Schlagwerk. A Trommler muaß her, aba wo zum Deife findst an oidn Deppn, der wo Rockmusi mog, zu de andern Vegl dazua passt und dem a no gfoit was de scho so ois gschriebn ham?

Wia so oft huift da Zufoi. Nach ewigem rumtelefoniern hat da Harti dafragt, dass in Peißenberg an Trommla gab der wo passn kannt. Er hat`n glei ogruafa und auf d`Prob eigladn. Da Woiter is a sofort kema und koane 3 Liadl spader war klar, des passt. Vo da weg sans durchgstart. Eanare Auftritt haben eana an Haufen Erfoig und Spaß eibracht, aber irgendwia hams a gspannt, dass no ebas foit.

Ois hats so sei miaßn, lernt da Woiter beim Berg geh auf`n Kramer an so an ganz luschtigen Buam aus Haba kenna, und fangt s`Ratschn mit eam o. De merken glei, dass a jeda a Musikant is. Da hat da Woiter na natürlich andauernd vo seim Erfoig und seina Freid mit Rowa Ash gred. Bis a gmerkt hat, dass der Kamerad oiwei trauriga wordn is. I spui Klavier, alloa in da Stubn, sagt a kloalaut. Da Woiter lad eam daraufhi sofort zur Prob ei, und seitdem keat da Christian dazua.

Rowa Ash is komplett.